الدوائر الرسمية
.. معاناة ..أفلام رعب ...
يا جماعة .... الوضع اللي انا في لا أحسد عليه ابدا ....
يعني الكل بيعرف انو البكلوريات الناجحين عم يسجلوا بالكليات او بالمعاهد ولازم
يجيبو الطلبات من وييييييييييييييييييين ؟؟؟؟؟
من الدوائر الرسمية .... اللي مختصة بشؤون الطلاب المعترين ....
وشي طبيعي انو وضع الطالب عنا متل وضع الشرشوح ....
بيروح ما بيلاقي غير وجوه ناشفة وناس معصبة .... وكل العالم عم تعفر في .... بيسأل
سؤال بيقلولك الجواب بلهجة كأنك عم تطلب منهن شي خمسين الف ليرة .... هي عدالك عن
لما بيلتعي لسانك وانت عم تسأل السؤال نفسو شي خمس مرات وما حدا بيرد عليك ...
ليش يا حزرك .؟؟؟؟
بيكونو مشغولين بقصص الصباح .... (يعني من وين جاب جوزك التلاجة تبعيتكون .... ومن
ايمت اتطلقت سميرة ... وانتي شو عرفك بموضوع خطبة هدى .... ودخلك كيف مات ابوه
لفراس )
وطبعا الطالب ملطوع على الباب .... عم ينتظر الجواب ....
وهاد الشي طبعا صار معي .... قمت قلتلها لهي الموظفة المحترمة جدا ... لو سمحتي
ممكن تجاوبيني على سؤالي بعدين تحدثي قد ما بدك ...؟؟؟
قام قالتلي الجواب بس وهي معصبة علي ... إنو كيف بقاطعها عن حديثها المهم بحق سميرة
... معليش الحق علي ... انا الغلطانة ... هي سميرة هي ... !!!
المهم انبحتت عليها ... طبعا بعد ما عرفت شو بدي منها ... وقلتلها شكرا كتير على
اللطف وطلعت وطبشت الباب ....
بس لعما .... لك شو هاد ....
وعداك عن هيك .... رحت لحتى سجل ... تخيلو .... رحت أكتر من خمس مرات ... لما روح
يقولولي ما عاد في دور ....
اخر مرة رحت .... اضطريت اني أعطي رشوة للشب اللي عم يسجل الأسماء ... لحتى يحطلي
اسمي ... قام مو بس حطلي اسمي ... وحطني كمان على راسو من فوق ....
( لو سمحتو بعدو للأنسة خليهاتوقف بالدور .... ازا بتريدي يا أنسة لا تتركي مكانك
... )
وشي طبيعي انو الواحد بيضل واقف بالدور .... من الساعة 7 ونص .... الصبح .,,,,
لساعة غير محددة ...
وكل الدوائر الرسمية بتبلش دوام من الساعة 8 ... الا الدوائر لشؤون الطلاب ...
تقاااااااااااال ... للساعة 9 ونص لشرفت الموظفة ... والعالم كلها ملطوعة برا ...
وعداك عن أعمال العنف بحق الطالب اللي بيقطع عن دورو ... او بيروح ليجيب شغلة
وبيرجع ما بيلاقي محلو ... يا حرام شو بيصير في ....
عداك عن البهادل اللي على الطالعة والنازلة بياكلوها من المشرفين ازا نسيانين شي
ورقة
على فكرة الوضع ما عاد ينسكت عنو .... هيييييييييك كتيييييييير ... لك شو هاد ...
ازا الواحد من غير واسطة او رشاوي ما بيمشي .... لعما لكان الطالب المعتر شو بيعمل
....
وبيقولوك خلص وضع البلد كتير منيح .... لا رشاوي ... لا واسطات .... لا ذل ....
الوضع من اسوأ لأسوأ .... وازا بدي قول اتعودت .... يمكن لسا ما شفت شي .....
انتو شو رأيكون ؟؟؟

حلم 
اقرب الى الخيال

مشكلة
قديمة حديثة ... نتحدث بها كل يوم في كل اجتماع , في كل جلسة عائلية هي مشكلة
المنشأة الرياضية في مدينة جرمانا , منذ كنت في الفريق صغار النادي لكرة القدم و
انا اسمع بان منشاة ضخمة تم استملاكها و سيتم البدء في العمل فيها قريباً الان اصبح
عمري 22 عام و لم ارى سوى ملعب ترابي لا يصلح حتى لركوب الخيل .هل من المعقول بان
مدينة  مثل مدينتنا عدد سكانها المسجلين فقط 22 الف نسمة لا يوجد  فيها مكان
لممارسة اي لعبة رياضية فردية كانت ام جماعية .وعود مقدمة من كل الجهات , الاتحاد
يضع الكرة في ملعب الادارة , الادارة تضعه في ملعب البلدية , البلدية تقول بأن
المشكلة هي في اصحاب الاراضي المستملكة .لا نعرف الى من نعرض مشكلتنا نريد حلاً
سريعاً لهذه المشكلة ..نرضي فيه جميع الأطراف فليس من المعقول ان نستملك ارضاً
زراعية يقدّر ثمنها بملايين الليرات مقابل مبالغ بخسة جداً ..جداً .

و من غير
المعقول ايضاً ان نظل نحلم بأبسط الاسس و القواعد لبناء رياضة جيدة تساهم في تطورنا
الفكري و الجسماني على حد سواء

هادي اللبان

يسعدنا ان نضع جهدنا المتواضع بين ايديكم ولخدمتكم , و وفاءً منا لمدينة الشهامة و الفداء جرمانا جارة الفيحاء

مدينة جرمانا في الفكر و القلب دائماً معطاءة لأهلها , مضيافة لزوارها فواحة بعطر
المحبة و الوفاء حالها كسائر مدن سوريا الغالية منار لكل ذي حاج

نقدم ( موقع مدينة جرمانا ) كجهد صغير نطمح من خلاله استذكار روح الرجولة و الشهامة عن طريق تقنية العصر الحديث , لشبابنا وشاباتنا نقدم ذكريات أهلنا لنعود بذاكرتنا الى ايام خلت كانت القيم هي الخبز
والزاد نستلهمها من خلال قنوات المعلوماتية لنجعل حافزاً لجيل الغد
بالتواصل مع تقنية العصر مع عمق احساسنا بالانتماء الى هذه البقعة من سوريا العز حاولنا أن نطلق هذا الموقع ليكون وسيلة تواصل في ما بيننا وليتعرف الاخرين بمدينة جرمانا بوسيلة هذا القرن من التواصل و التي هي التقنية والمعلوماتية و تحت ظل راعيها الرفيق الدكتور الرئيس بشار حافظ الاسد حماه الله ومن عزمه و على خطاه الى الامام